Rhaglen a chofnodion

Pwrpas:   1.      Rhoi cyflwyniad i’n hathletwyr Paralympaidd lleol er mwyn cydnabod eu llwyddiannau yn ennill Medalau Aur yng Ngemau Paralympaidd Haf 2024 ym Mharis.

2.      Rhoi cyflwyniad i Gynghorwyr Sir presennol a chyn Gynghorwyr Sir sydd wedi cyflawni 25 mlynedd o wasanaeth yn olynol fel aelod etholedig yng Nghyngor Sir y Fflint.

Gwnaed cyflwyniadau i Sabrina Fortune a Rhys Darbey i gydnabod eu llwyddiannau yn ennill Medalau Aur yng Ngemau Paralympaidd Haf 2024 ym Mharis.

Ar ben hynny, cyflwynwyd bathodynnau i’r Cadeirydd a’r Cynghorwyr Ian Roberts, Hilary McGuill, Ron Davies a Chris Bithell, ynghyd â’r cyn Gynghorydd Neville Phillips, a oedd wedi bod yn Aelodau Etholedig yng Nghyngor Sir y Fflint am 25 o flynyddoedd neu fwy.

Pwrpas:        Derbyn Cwestiynau Cyhoeddus ar gyfer yr eitem hon: mae un wedi cael ei dderbyn ac wedi ei atodi.

Dywedodd y Cadeirydd fod un cwestiwn wedi dod i law, fel y dangoswyd yn y rhaglen.  Pan wahoddwyd Colin Randerson i gyflwyno ei gwestiwn, diolchodd i’r Cadeirydd a’r Cyngor am y cyfle i fynychu’r cyfarfod a darllenodd ei gwestiwn (eitem rhif 3 ar y rhaglen).

Fel Aelod Cabinet Cynllunio, Iechyd y Cyhoedd a Gwarchod y Cyhoedd, darparodd y Cynghorydd Chris Bithell ymateb i’r cwestiwn.

Gofynnodd Colin Randerson gwestiwn ategol a dywedwyd wrtho y byddai ymateb ysgrifenedig yn cael ei ddarparu ar ôl y cyfarfod.

Pwrpas:        I dderbyn unrhyw ddatganiad o gysylltiad a chynghori’r Aelodau yn unol a hynny.

Dim.

Pwrpas:        Derbyn unrhyw gyhoeddiad fel y'i dosbarthwyd.

Roedd copi o’r cyhoeddiadau yn rhestru’r digwyddiadau yr oedd wedi’u mynychu o 5 Rhagfyr 2024 i 28 Ionawr 2025 wedi cael ei ddosbarthu cyn y cyfarfod.

Pwrpas:        Mae hwn yn gyfle i Aelodau’r Cyngor gyflwyno deisebau ar ran pobl yn eu ward. Unwaith y byddant wedi dod i law, caiff deisebau eu pasio i'r Prif Swyddog priodol ar gyfer gweithredu ac ymateb iddynt.

Dim.

Pwrpas:        Pwrpas yr adroddiad hwn yw cyflwyno, er argymhelliad y Cyngor, Cyllideb y Cyfrif Refeniw Tai ar gyfer 2025/26, Cynllun Busnes y Cyfrif Refeniw Tai a chrynodeb o’r Cynllun Busnes Ariannol 30 blynedd.

Cyflwynodd y Prif Swyddog (Tai a Chymunedau) adroddiad (eitem rhif 7 ar y rhaglen) i geisio cymeradwyaeth ar gyfer Cyllideb y Cyfrif Refeniw Tai (CRT) ar gyfer 2025/26, Cynllun Busnes y CRT, a’r crynodeb o’r Cynllun Busnes Ariannol 30 mlynedd.  Rhoddodd gyflwyniad ar y cyd â’r Rheolwr Cyllid Strategol a’r Rheolwr Gwasanaeth (Asedau Tai) ar y pwyntiau allweddol i’w hystyried.

Yn ystod y drafodaeth, awgrymwyd bod y Cynghorydd Mansell yn cysylltu â’r Rheolwr Gwasanaeth yn uniongyrchol i drafod safleoedd garejis yn ei ward.

Ar ôl pleidlais, cafodd yr argymhellion eu derbyn.

PENDERFYNWYD:

(a)     Cymeradwyo cyllideb y CRT ar gyfer 2025/26, fel y nodir yn yr adroddiad;

(b)     Cymeradwyo'r isafswm cynnydd rhent arfaethedig o 2.7%;

(c)     Cymeradwyo'r cynnydd arfaethedig o 2.7% yn rhent garejis;

(d)     Cymeradwyo’r cynnydd arfaethedig o ran taliadau gwasanaeth i adennill cost lawn;

(e)     Cymeradwyo’r pwysau a’r arbedion effeithlonrwydd a nodir yn Atodiad A; a

(f)      Chymeradwyo’r Rhaglen Gyfalaf CRT arfaethedig ar gyfer 2025/26, fel nodir yn Atodiad B.

Pwrpas:        Cyflwyno drafft Adroddiad Canol Blwyddyn Rheoli'r Trysorlys ar gyfer 2024/25 i'r Aelodau.

Cyflwynodd y Rheolwr Cyllid Corfforaethol adroddiad (eitem rhif 8 ar y rhaglen) i geisio cymeradwyaeth ar gyfer adroddiad canol blwyddyn Rheoli’r Trysorlys 2024/25 yn dilyn cymeradwyaeth gan y Pwyllgor Llywodraethu ac Archwilio a’r Cabinet.

Cefnogwyd yr argymhelliad.

PENDERFYNWYD:

Cymeradwyo Adroddiad Canol Blwyddyn Rheoli’r Trysorlys 2024/25.

Pwrpas:        Cymeradwyo Adroddiad Blynyddol y Pwyllgor Llywodraethu ac Archwilio 2023/24.

Cyflwynodd y Rheolwr Archwilio Mewnol, Perfformiad a Risg adroddiad (eitem rhif 9 ar y rhaglen) i geisio cymeradwyaeth Adroddiad Blynyddol y Pwyllgor Llywodraethu ac Archwilio ar gyfer 2023/24.

Cefnogwyd yr argymhelliad.

PENDERFYNWYD:

Cymeradwyo adroddiad blynyddol y Pwyllgor Llywodraethu ac Archwilio ar gyfer 2023/24.

Pwrpas:        Mae’r eitem hon i dderbyn unrhyw Rybudd o Gynnig.  Mae tri wedi cael eu derbyn a’u hatodi i’r rhaglen.

Dywedodd y Prif Swyddog (Llywodraethu) fod y Rhybuddion o Gynnig canlynol wedi cael eu cyflwyno:

Rhybudd o Gynnig: Ystadau’r Goron

Cyflwynodd y Cynghorydd Simon Jones y Rhybudd o Gynnig (adroddiad (eitem rhif 10 ar y rhaglen) a gafodd ei eilio gan y Cynghorydd David Healey.

Yn ystod trafodaeth, cynigodd y Cynghorydd David Healey ddiwygiad y dylid gofyn i Lywodraeth y DU drosglwyddo cyllid yn uniongyrchol i awdurdodau Cymru ac fe eiliwyd hyn gan y Cynghorydd Marion Bateman.  Eglurodd y Cynghorydd Simon Jones ei rhesymau dros wrthod y diwygiad a thynnodd y Cynghorydd Healey ei ddiwygiad yn ôl wedi hynny.

Cytunodd y Cynghorydd Simon Jones i gynnwys geiriad ychwanegol ar ‘welyau afon llanw’ o fewn cwmpas asedau Ystâd y Goron yn ei Rybudd o Gynnig.

Ar ôl pleidlais, cefnogwyd y Rhybudd o Gynnig fel y’i diwygiwyd.

PENDERFYNWYD:

1.      Bod Cyngor Sir y Fflint yn cefnogi’r ymgyrch i ddatganoli rheolaeth Ystâd y Goron a’i hasedau yn cynnwys gwelyau afon llanw, yng Nghymru i Lywodraeth Cymru a bod yr arian sydd wedi cael ei godi yn cael ei rannu’n deg i Awdurdodau Lleol Cymru i gefnogi anghenion cymdeithasol y bobl sy’n byw yn ein cymunedau; a

2.      Bod y Cyngor yn cyfarwyddo Arweinydd y Cyngor i ysgrifennu at Lywodraeth Cymru ac Aelodau Senedd Cymru ac Aelodau Senedd San Steffan sy’n cynrychioli Sir y Fflint yn amlinellu ein cefnogaeth i berswadio San Steffan i ddatganoli Ystâd y Goron.

Rhybudd o Gynnig: Ardoll Agregau

Cyflwynodd y Cynghorydd Andrew Parkhurst y Rhybudd o Gynnig adroddiad (eitem rhif 10 ar y rhaglen) a gafodd ei eilio gan y Cynghorydd Fran Lister.

Cefnogwyd y Rhybudd o Gynnig.

PENDERFYNWYD:

1.      Bod y Cyngor yn gwneud cais i Arweinydd a Phrif Weithredwr y Cyngor ysgrifennu at Mark Drakeford AS fel Aelod Cabinet Cyllid a galw ar Lywodraeth Cymru i drafod datganoli Ardoll Agregau gyda Llywodraeth y DU mewn ffordd sy’n sicrhau bod yr awdurdodau lleol y ceir y mwynau ohonynt yn elwa’n uniongyrchol ac yn gyfatebol o’r Ardoll; a

2.      Bod y Cyngor yn cael cefnogaeth ar gyfer y dull hwn gan awdurdodau lleol eraill drwy ei aelodaeth o Weithgor Agregau Rhanbarthol Gogledd Cymru a thrwy sianeli priodol eraill.

Rhybudd o Gynnig: Addysgu Gartref

Cyflwynodd y Cynghorydd Hilary McGuill y Rhybudd o Gynnig adroddiad (eitem rhif 10 ar y rhaglen) a gafodd ei eilio gan y Cynghorydd Mared Eastwood.

Dywedodd y Cynghorydd Teresa Carberry fod llythyr wedi cael ei anfon gan y Pwyllgor Trosolwg a Chraffu Addysg, Ieuenctid a Diwylliant i Lywodraeth Cymru (LlC) yn 2023 i gefnogi cael cofrestr ar gyfer plant sy’n cael eu haddysgu gartref.  Darllenodd yr ymateb a oedd yn cadarnhau bod hyn ymysg nifer o ddewisiadau a oedd yn cael eu hystyried gan LlC i gryfhau’r fframwaith.

Yn dilyn trafodaeth, cytunodd y Cynghorydd McGuill y byddai’r sylwadau a godwyd gan Aelodau yn cael eu hadlewyrchu yn y llythyr i LlC.  Ar y sail honno, cefnogwyd y Rhybudd o Gynnig.

PENDERFYNWYD:

Bod y Cyngor yn gofyn bod llythyr pellach yn cael ei  ...  view the full Cofnodion text for item 77.

Pwrpas:        Cymeradwyo'r Datganiad Polisi Tâl draft 2025/26.

Cyflwynodd y Rheolwr Corfforaethol (Pobl a Datblygu Sefydliadol) adroddiad (eitem rhif 11 ar y rhaglen) i geisio cymeradwyaeth ar gyfer y Datganiad Polisi Tâl 2025/26 a oedd yn rhaid ei gyhoeddi o fewn y terfynau amser statudol.

Mewn ymateb i’r sylwadau am y potensial i ehangu tâl ar sail perfformiad ar gyfer pob gweithiwr, dywedodd y Prif Weithredwr y byddai hyn yn cael ei gynnwys yn un o’r ffrydiau gwaith yn y Rhaglen Drawsnewid.

Cefnogwyd yr argymhellion, yn amodol ar ddiwygiad i’r gwall teipograffyddol ar dudalen 16 y Datganiad Polisi Tâl.

PENDERFYNWYD:

(a)     Yn amodol ar y diwygiad ar dudalen 16, cymeradwyo'r Datganiad Polisi Tâl drafft sydd wedi’i atodi ar gyfer 2025/26; a

(b)     Bod y Cyngor Sir yn rhoi awdurdod dirprwyedig i’r Rheolwr Corfforaethol (Pobl a Datblygu Sefydliadol) i ddiweddaru Datganiad Polisi Tâl 2025/26 yn ystod y flwyddyn i adlewyrchu unrhyw newidiadau sy’n ofynnol gan ddeddfwriaeth, polisi’r Llywodraeth neu drafodaethau cenedlaethol fel ei fod yn parhau i fod yn gywir ac yn gyfredol.

Pwrpas:        Nodi’r atebion i unrhyw gwestiwn a gyflwynwyd yn unol â Rheol Sefydlog 9.4(A) y Cyngor Sir: daeth pump i law erbyn y dyddiad cau.

Derbyniwyd pum cwestiwn (eitem rhif 12 ar y rhaglen) erbyn y dyddiad cau.  Darllenwyd y cwestiynau gan yr Aelodau a oedd wedi’u cyflwyno ac fe gawsant eu hateb gan yr Aelod Cabinet perthnasol.  Gofynnwyd rhai cwestiynau ategol a fydd yn cael eu hateb yn ysgrifenedig.

Roedd cwestiwn brys a gyflwynwyd i’r Aelod Cabinet Gwasanaethau Stryd a Thrafnidiaeth wedi cael ei dderbyn ar ôl y dyddiad cau a chafodd ei ganiatáu.  Dosbarthwyd ymateb ysgrifenedig ar ran yr Aelod Cabinet nad oedd yn bresennol.

Pwrpas:        Ystyried unrhyw faterion a godwyd gan yr Aelodau o Gofnodion cyfarfodydd y Cabinet, Pwyllgorau Craffu a Phwyllgorau eraill, ynghyd ag unrhyw gwestiynau a godwyd dan Adran 4.20 Cyfansoddiad y Cyngor. Os bydd angen, mae’n bosib cael gafael ar gopïau o Gofnodion yr amrywiol gyfarfodydd a gynhaliwyd ers cyfarfod arferol diwethaf y Cyngor, sydd wedi’u cymeradwyo a’u cyhoeddi ar wefan yr Awdurdod, drwy fynd i’r Adran Pwyllgorau a Gwasanaethau’r Aelodau.

Dim.

Roedd naw aelod o’r cyhoedd yn bresennol ar ddechrau’r cyfarfod.