Mater - cyfarfodydd

I ddiweddaru Aelodau o’r camau gweithredu hyd yma yn dilyn Rhybudd o Gynnig yn ymwneud â thrwyddedu cartrefi symudol preswyl.

Cyflwynodd y Rheolwr Gwarchod y Gymuned a Busnes yr adroddiad a oedd yn dilyn y Rhybudd o Gynnig a basiwyd yn y Cyngor Llawn ar 20 Mehefin 2023 mewn perthynas â thrwyddedu cartrefi symudol preswyl, gyda'r penderfyniadau yn cael eu hamlygu ym mhwynt 1.01 o'r adroddiad.   Rhoddwyd trosolwg o ddiben a chraffu ceisiadau trwyddedu a oedd yn caniatáu i drigolion y safleoedd gyflwyno sylwadau.  Ar hyn o bryd y pwyllgor trwyddedu oedd yn gyfrifol am ddirprwyo, ond yn ymarferol roedd y rhain wedi'u dirprwyo i swyddogion.  Trafodwyd hyn yng nghyfarfod diwethaf y Pwyllgor Trwyddedu ar 4 Hydref a phenderfynwyd y dylai unrhyw benderfyniadau ynghylch ceisiadau yn y dyfodol gael eu gwneud gan y pwyllgor trwyddedu llawn.  Roedd hwn yn argymhelliad yr oedd y Pwyllgor Trwyddedu yn dymuno ei wneud yn hytrach na’i fod yn cael ei ddirprwyo i is-bwyllgor neu i swyddogion a chytunwyd i ystyried pob cais o dan y broses hon.  Gan fod hwn yn newid sylweddol roedd hyfforddiant gorfodol arbenigol wedi'i drefnu ar gyfer Aelodau'r Pwyllgor Trwyddedu a oedd bellach wedi'i agor i'r holl Aelodau petaent yn dymuno mynychu a byddai hyn yn darparu dirprwyon i'r Pwyllgor Trwyddedu pe bai angen. 

Yna esboniodd y Rheolwr Gwarchod y Gymuned a Busnes y byddai angen paratoi Polisi ar safonau ymgynghori gofynnol ar gyfer aelodau ward a thrigolion ac y byddai angen cymeradwyaeth y Cyngor Llawn maes o law.  Darparwyd gwybodaeth am y penderfyniadau allweddol ar gyfer ceisiadau a oedd yn cynnwys natur y penderfyniad a'r cyfnod ymgynghori 21 diwrnod arfaethedig a roddwyd i drigolion ar y safleoedd ac aelodau wardiau.   Ni chyfeiriwyd at y cyfnod ymgynghori yn neddfwriaeth 2013 ond yr hyn y cyfeiriwyd ato oedd y cyfnod yr oedd yn ofynnol i'r awdurdod wneud y penderfyniad os nad oedd y ddwy ochr yn cytuno o fewn amserlen o ddau fis.  Wrth gyflwyno'r cyfnod ymgynghori 21 diwrnod, teimlwyd bod hon yn amserlen gyraeddadwy a fyddai'n galluogi'r adroddiadau angenrheidiol a'r dogfennau ategol i gynorthwyo'r aelodau i fod yn barod.  I gloi, croesawodd y Rheolwr Gwarchod y Gymuned a Busnes arweiniad y Pwyllgor ar hyn ac anogodd unrhyw aelodau a hoffai fynychu’r hyfforddiant i wneud hynny.  

Cadarnhaodd y Cynghorwyr Antony Wren, Ted Palmer ac Ian Hodge y byddai ganddynt ddiddordeb mewn mynychu'r hyfforddiant. 

            Cadarnhaodd y Rheolwr Gwarchod y Gymuned a Busnes fod yr hyfforddiant ar-lein ar fore 4 Rhagfyr 2023.

 Adroddodd y Cynghorydd Alasdair Ibbotson mai ef oedd eilydd y Rhybudd o Gynnig gwreiddiol a'i fod yn dymuno cynnig argymhellion 1 a 3 yn yr adroddiad. Yna roedd yn dymuno gwneud mân ddiwygiad i argymhelliad 2. 

“I’r Aelodau gefnogi cyfnod ymgynghori o 21 diwrnod ar gyfer Aelodau Ward a thrigolion y safleoedd hyn a bod yr holl hysbysiadau yn cael eu hanfon trwy lythyr at bob eiddo a restrwyd ar gyfer Treth y Cyngor ar y safleoedd a bod y rhain yn amodol ar y penderfyniadau trwyddedu”.

Eglurodd y Cynghorydd Ibbotson fod nifer anghymesur o drigolion ar y safleoedd hyn wedi'u heithrio’n ddigidol o’i gymharu â thrigolion eraill yn y sir.  ...  view the full Cofnodion text for item 18