Mater - cyfarfodydd

Pwrpas:        Darparu’r wybodaeth ddiweddaraf am ddatblygiad y rhaglen ac i geisio cymeradwyaeth ar gyfer y fframwaith blaenoriaethau a’r prosesau sydd eu hangen i roi’r rhaglen ar waith.

Cyflwynodd y Cynghorydd Healey yr adroddiad, gan egluro y byddai’r Gronfa Ffyniant Gyffredin yn darparu buddsoddiad o £2.5 biliwn hyd at fis Mawrth 2025 ar draws y DU. Nod y rhaglen oedd “meithrin balchder mewn lleoedd a chynyddu cyfleoedd bywyd”.  Mae Llywodraeth y DU wedi dyrannu £126 miliwn i Ogledd Cymru ar gyfer darparu’r rhaglen rhwng 2022/2023 a 2024/2025 ac roedd £10.8 miliwn wedi’i ddyrannu i Sir y Fflint ar gyfer y rhaglen graidd.

Roedd yr adroddiad yn darparu’r wybodaeth ddiweddaraf am ddatblygiad yr isadeiledd rheoli rhaglen, yn lleol ac yn rhanbarthol, ac yn nodi’r blaenoriaethau a argymhellir ar gyfer y rhaglen, yn ogystal â’r meini prawf a fyddai’n cael ei ddefnyddio i asesu’r prosiectau sy’n ceisio cyllid drwy’r rhaglen.                         

Roedd yr adroddiad hefyd yn rhoi diweddariad eang ar brosiectau strategol y Cyngor, a oedd wrthi’n cael eu datblygu’n barod ar gyfer y rhaglen.

Enwebwyd Cyngor Gwynedd fel y prif gorff sy’n atebol am y rhaglen yng Ngogledd Cymru. Cyn i Lywodraeth y DU gymeradwyo’r rhaglen, bu swyddogion o’r chwe awdurdod lleol yn paratoi’r systemau sydd eu hangen ar gyfer dyrannu a rheoli cyllid y rhaglen.

Dywedodd y Prif Swyddog (Cynllunio, yr Amgylchedd a’r Economi) fod yr adroddiad wedi cael ei ystyried yng nghyfarfod diweddar Pwyllgor Trosolwg a Chraffu yr Amgylchedd a’r Economi, a’i fod wedi cael ei gefnogi.

PENDERFYNWYD:

(a)       Nodi’r cynnydd a wnaed o ran datblygu rhaglen y Gronfa Ffyniant Gyffredin yn rhanbarthol ac yn lleol; a

(b)       Chymeradwyo’r amlinelliad bras o’r strwythurau a’r prosesau a ddefnyddir i gyflawni’r rhaglen, a rhoi awdurdod dirprwyedig i’r Prif Swyddog (Cynllunio, yr Amgylchedd a’r Economi) a’r Aelod Cabinet Newid Hinsawdd a’r Economi, i’w diwygio a’u cwblhau yn ôl yr angen, unwaith y bydd Llywodraeth y DU wedi cymeradwyo’r rhaglen ac y bydd y telerau a’r amodau terfynol ar gael.