Mater - cyfarfodydd

Pwpras:        Cyflwyno’r model cyflogaeth rhanbarthol arfaethedig ar gyfer y rhaglen Profi, Olrhain a Diogelu.

Cyflwynodd y Cynghorydd Roberts yr adroddiad a oedd yn argymell fod y rhanbarth yn symud i fodel cyflogaeth, i’w ariannu’n llawn gan LlC, gyda Sir y Fflint yn gweithredu fel yr un cyflogwr i’r chwe awdurdod lleol. Byddai’r Bwrdd Iechyd yn gweithredu fel y cyflogwr i’r tîm arbenigol rhanbarthol. 

Diolchodd i’r Prif Weithredwr am yr holl waith yr oedd ef a’i dîm wedi gwneud i roi’r Rhaglen Profi, Olrhain a Diogelu ar waith. Roedd yr Aelodau Cabinet i gyd yn cytuno â hyn, yn enwedig am lwyddo i gael y cyllid ar gyfer y Rhaglen.

Fel Cadeirydd y Pwyllgor Trosolwg a Chraffu Adnoddau Corfforaethol, gwnaeth y Cynghorydd Carver y sylwadau canlynol :

“Rwyf yn fodlon â’r adroddiad ac yn cytuno â’r Argymhellion”.

PENDERFYNWYD:

(a)       Cefnogi cymryd rhan lawn mewn Rhaglen ranbarthol Profi, Olrhain a Diogelu, a mabwysiadu’r model gweithredu hybrid o gyflogaeth i gapasiti graddfa ganolig, wedi’i ategu gan gronfa wrth gefn neu ‘fanc’ o weithwyr awdurdod lleol;

(b)       Cymeradwyo’r cynnig fod Sir y Fflint yn gweithredu fel y cyflogwr i’r rhaglen ranbarthol ar ran y chwe awdurdod lleol;

(c)        Nodi fod y pum awdurdod lleol partner wedi rhoi llythyr ymrwymo i Sir y Fflint fel y cyflogwr cyn cael Cytundeb Rhyng Awdurdod llawn a chyn ymrwymo adnoddau;

(d)       Awdurdodi’r Prif Weithredwr i roi’r Cyngor mewn Cytundeb Rhyng Awdurdod ffurfiol a rhwymol gyda chynghorau Ynys Môn, Gwynedd, Conwy, Sir Ddinbych a Wrecsam;

(e)       Rhoi awdurdod dirprwyedig i’r Prif Weithredwr i lunio ymrwymiadau cytundebol i gyflogi gweithwyr rhaglen, ac ymrwymo gwasanaethau cymorth, yn dilyn y ffaith y cafwyd cadarnhad o ddyraniad cyllideb ddigonol gan Lywodraeth Cymru; a

(f)        Bod adroddiadau chwarterol yn cael eu cyflwyno i’r Cabinet ar gynnydd a pherfformiad y rhaglen.