Manylion y penderfyniad

Cyflwynodd y Cynghorydd Butler yr adroddiad ac eglurodd fod y Cabinet wedi cytuno i drosglwyddo Theatr Clwyd i fodel llywodraethu newydd yn rhan o Raglen Model Cyflenwi Amgen y Cyngor.  Roedd Theatr Clwyd a’r Gwasanaethau Cerdd i gael eu rheoli gan gwmnïau elusennol annibynnol, wedi’u cyfyngu trwy warant, o 1 Ebrill 2021 ymlaen.

            Roedd yr adroddiad yn nodi (1) y trefniadau trosglwyddo, (2) diwydrwydd dyladwy, (3) y contract gwasanaeth drafft a oedd yn cael ei lunio gyda chyngor cyfreithiol a (4) y cynnig gan Theatr Clwyd Trust Ltd i reoli’r Gwasanaethau Theatr a Cherdd.

PENDERFYNWYD:

 (a)      Bod y Cabinet yn fodlon â’r trefniadau i drosglwyddo Theatr Clwyd a’r Gwasanaethau Cerdd, a’i fod wedi’i sicrhau bod diwydrwydd dyladwy wedi’i roi;

 (b)      Derbyn y cynnig i Fwrdd Ymddiriedolaeth newydd ysgwyddo trefniadau rheoli Theatr Clwyd, yn seiliedig ar yr egwyddorion a’r cynigion sydd wedi’u nodi yn yr adroddiad blaenorol i’r Cabinet;

 (c)       Rhoi awdurdod dirprwyedig i’r Prif Weithredwr i lofnodi cytundeb ffurfiol i wneud trosglwyddiad rhwng y Cyngor a’r Ymddiriedolaeth yn seiliedig ar yr egwyddorion a’r cynigion sydd wedi’u nodi yn yr adroddiad blaenorol i’r Cabinet;

 (d)      Bod trosglwyddiadau Theatr Clwyd, Theatr Clwyd Productions Ltd a’r Gwasanaethau Cerdd i berchnogaeth Theatr Clwyd Trust Ltd yn cael eu gwneud ar 1 Ebrill 2021; a

 (e)      Chymeradwyo’r raddfa gyflog ddiwygiedig ar gyfer y Gwasanaeth Cerdd.