Manylion y penderfyniad

Adolygu a rhoi sylwadau ar bwysau ariannol dan gylch gwaith y Pwyllgor.

Cyflwynodd y Rheolwr Cyllid Corfforaethol adroddiad (eitem rhif 7 ar y rhaglen) i’r Aelodau ei adolygu a rhoi sylwadau arno, a oedd yn sôn am bwysau o ran cost a risgiau cysylltiedig dan gylch gwaith y Pwyllgor.

Gan ymateb i gwestiynau am Wasanaethau Corfforaethol, byddai ymateb manwl yn cael ei ddarparu i’r Pwyllgor am gostau ychwanegol ar gyfer y rhwydwaith goleuadau stryd.  O ran biliau ynni adeiladau corfforaethol, byddai swyddogion yn gweithio trwy ostyngiad posibl o ran gofyniad y gyllideb a fyddai’n cael ei adlewyrchu mewn adroddiadau ar y gyllideb yn y dyfodol.  O ran gwahanu praesept Awdurdod Tân ac Achub Gogledd Cymru, byddai’r Prif Swyddog (Llywodraethu) yn ceisio cadarnhad o ran a fyddai’r Prif Swyddog Tân yn bresennol yng nghyfarfod y Pwyllgor ym mis Rhagfyr.

O ran Llywodraethu, byddai’r Prif Swyddog (Llywodraethu) yn ymateb ar wahân am y cais i gario £210,000 ymlaen o’r flwyddyn flaenorol, nad oedd wedi’i ddefnyddio’n llawn i ariannu’r swyddi a ddynodwyd.

O ran adroddiadau ar y gyllideb yn y dyfodol, dywedodd y Cadeirydd y byddai’n ddefnyddiol i Aelodau gyflwyno cwestiynau mwy manwl o flaen llaw er mwyn gallu darparu ymateb llawn.

Cefnogwyd yr argymhellion yn yr adroddiad.

PENDERFYNWYD:

(a)          Bod y sylwadau a godwyd gan y Pwyllgor am bwysau cost y Gwasanaethau Corfforaethol yn cael eu cyfeirio i’r Cabinet; a

(b)          Bod y sylwadau a godwyd gan y Pwyllgor am bwysau cost y Portffolio Llywodraethu yn cael eu cyfeirio i’r Cabinet.