Manylion y penderfyniad

Cyflwynodd y Rheolwr Cyllid Strategol sefyllfa monitro cyllideb refeniw 2023/24 ym mis 7 ar gyfer Cronfa’r Cyngor a’r Cyfrif Refeniw Tai, cyn i’r Cabinet ei hystyried.

O ran Cronfa’r Cyngor, roedd y sefyllfa ddisgwyliedig ar ddiwedd y flwyddyn yn golygu bod bwlch o £3.671m, heb gynnwys effaith y dyfarniad cyflog a fyddai’n dod o’r cronfeydd wrth gefn, ar y pryd wedi’i amcangyfrif yn £2.727m.  Byddai hyn yn gadael balans ar ddiwedd y flwyddyn yn y gronfa wrth gefn at raid o £3.664m ar ôl ystyried yr amcangyfrif o effaith y dyfarniadau cyflog a’r dyraniadau a gymeradwywyd yn flaenorol.  Roedd trosolwg o amrywiannau sylweddol ar draws portffolios yn ystod y cyfnod yn dweud bod lefel y costau disgwyliedig ychwanegol ar gyfer digwyddiadau tywydd garw yn debygol o gyrraedd y trothwy ar gyfer Cyllid Cymorth Ariannol at Argyfwng gan Lywodraeth Cymru (LlC).  Roedd yr adroddiad yn cynnwys y sefyllfa ddiweddaraf ar risgiau yn ystod y flwyddyn a materion oedd yn dod i’r amlwg, ynghyd ag arbedion disgwyliedig oedd wedi’u cynllunio yn ystod y flwyddyn.  O ran cronfeydd wrth gefn heb eu clustnodi, adroddwyd mai £3.212m oedd balans y Gronfa wrth Gefn at Galedi Covid-19 ac y byddai’r gronfa wrth gefn oedd wedi’i chlustnodi at incwm Treth y Cyngor yn cael ei hargymell i’w throsglwyddo i’r Gronfa wrth Gefn at Raid.

O ran y Cyfrif Refeniw Tai, byddai tanwariant disgwyliedig yn ystod y flwyddyn o £0.100m yn is na’r gyllideb yn gadael balans terfynol heb ei glustnodi o £3.297m, a oedd yn uwch nag argymhelliad y canllawiau ar wariant.

Yn ateb i gwestiynau gan y Cynghorydd Bernie Attridge, rhoddwyd eglurhad yngl?n â mân newidiadau cronnol ar draws y Gwasanaethau Plant a’r newid mewn cyfraddau ar gyfer lleoliadau y tu allan i’r sir.  O ran Tai a Chymunedau, byddai’r swyddogion yn cael gafael ar ymateb i’r penderfyniad oedd y tu cefn i ddyraniad y Grant Cymorth Tai o fewn Datrysiadau Tai ac yn ei rannu.

Yn dilyn sylwadau’r Cynghorydd Alasdair Ibbotson ar danwariant Cynllunio, yr Amgylchedd a’r Economi a’r eglurhad blaenorol ar newidiadau yng nghyllideb y portffolio, cyfeiriodd y Cadeirydd at y wybodaeth fanwl oedd yn yr atodiad.

Ar sail hynny, cafodd yr argymhellion eu cynnig a’u heilio gan y Cynghorwyr Bernie Attridge a Jason Shallcross.

PENDERFYNWYD:

Ar ôl ystyried Adroddiad Monitro Cyllideb Refeniw 2023/24 (mis 7), bod y Pwyllgor yn cadarnhau nad oes unrhyw faterion penodol i’w codi gyda’r Cabinet.