Manylion y penderfyniad

To update Members on the current situation on the long term debt with the Betsi Cadwaladr University Health Board since the last report was received.

Cyflwynodd yr Uwch Reolwr (Diogelu a Chomisiynu) y wybodaeth ddiweddaraf ar ddyled hirdymor cyfredol gyda Bwrdd Iechyd Prifysgol Betsi Cadwaladr (BIPBC) mewn perthynas â phecynnau gofal a ariennir ar y cyd a chymorth i unigolion ag anghenion gofal cymhleth.

Cyfeiriodd yr adroddiad hwn at y fframwaith statudol sydd wedi’i roi ar waith gan Lywodraeth Cymru, sy’n nodi trefniadau i’r Byrddau Iechyd ddarparu Gofal Iechyd Parhaus y GIG (GIP) yng Nghymru, mewn partneriaeth ag Awdurdodau Lleol a sefydliadau eraill. Manylodd yr Uwch Reolwr ar nifer o heriau allweddol megis y gwahanol gymorth sydd ei angen ar oedolion a phlant, a'r nifer uchel o becynnau Gofal Iechyd Parhaus a ddarperir yn Sir y Fflint a Wrecsam. Mae perthnasoedd gwaith cadarnhaol gyda chydweithwyr yn y sector iechyd wedi helpu i ddatrys rhai materion sy’n bod ers amser maith yn y broses Gofal Iechyd Parhaus. Mae penodi Swyddog Cynllunio a Datblygu Gofal Iechyd Parhaus o fewn Gwasanaethau Cymdeithasol wedi galluogi’r tîm i wella prosesau mewnol ac ymgysylltu â BIPBC.

Mewn perthynas â lefelau dyled a adroddwyd ar 5 Medi 2022, roedd
ad-daliad o £46,333 wedi’i wneud ers hynny gan BIPBC ar gyfer anfonebau heb eu talu o dair blynedd a throsodd, gyda gwaith yn parhau i glirio’r anfonebau hanesyddol sy’n weddill. Dros y chwe mis diwethaf, roedd gwaith gan y tîm i ganolbwyntio ar ddatrys anfonebau newydd yn brydlon wedi helpu i leihau lefelau dyled tymor byr yn sylweddol. Ers mis Medi 2022, roedd anfonebau gwerth cyfanswm o £260,248 ar fin cael eu prosesu, sy’n ymwneud yn bennaf ag un achos penodol yn ymwneud â phlentyn.

Atgoffodd y Cadeirydd y Pwyllgor o gefndir yr adroddiad cychwynnol a rannwyd ym mis Rhagfyr 2021. Roedd ei bryderon yn ymwneud nid yn unig â cholli incwm disgwyliedig ond hefyd am yr amser a gymerwyd i ddatrys anfonebau dadleuol a oedd yn fater llif arian i'r Cyngor.

Eglurodd yr Uwch Reolwr bod y gwelliannau diweddar a roddwyd ar waith wedi arwain at ddealltwriaeth glir o’r prosesau ar y ddwy ochr.

Rhoddodd Paul Carter sicrwydd bod BIPBC yn gweithio’n agos gyda chydweithwyr y Cyngor i brosesu anfonebau cyfredol mewn modd amserol a bod ymgysylltu rheolaidd â swyddogion ar bob lefel i egluro’r rhesymau dros dalu anfonebau hanesyddol nad oedd wedi bod yn destun yr un broses drylwyr yn rhannol neu beidio â’u talu. Er ei fod yn obeithiol y byddai tua £250,000 o anfonebau oedd fod i gael eu hystyried gan banel BIPBC yn cael eu cymeradwyo i leihau’r ddyled hanesyddol ymhellach, roedd trafodaethau’n mynd rhagddynt i ganfod gwybodaeth ategol ar dri achos sy’n weddill gwerth cyfanswm o £350,000 a thros £400,000 o anfonebau yn ymwneud â phlant er mwyn i BIPBC allu cymeradwyo’r taliadau hynny. Yn benodol, ni chanfuwyd gwybodaeth ar ddau achos cost uchel hyd yma.

Codwyd pryderon gan y Cynghorydd Bernie Attridge ynghylch goblygiadau ariannol y ddyled sydd heb ei thalu, o ystyried y diffyg amserlen a rhagolwg cyllideb y Cyngor ar gyfer 2023/24. Dywedodd y dylai gweithdrefnau sydd i'w trafod mewn gweithdy wedi'u hwyluso eisoes gael eu deall yn glir.

Pwysleisiodd Paul Carter er bod prosesau priodol ar waith i gymeradwyo taliadau, ni ellir talu anfonebau heb yr hawl angenrheidiol a’r gwaith papur ategol. Roedd yn obeithiol y gellid datrys materion, ond nid oedd yn gallu rhoi amserlen heb fod y wybodaeth angenrheidiol yn cael ei darparu i gefnogi’r taliadau hynny.

Fel diweddariad ar y sefyllfa gyfredol, adroddodd yr Uwch Reolwr bod y ddyled sydd heb ei thalu o 2016 wedi’i lleihau i £1,461 a bod gwaith yn cael ei wneud ar hyn o bryd i fynd i’r afael â gwerth £12,518 o anfonebau o 2017. Yr amcangyfrif cyfredol o ddyled ar gyfer 2018 oedd £34,890.

Croesawodd y Prif Weithredwr y drafodaeth ar y mater pwysig hwn y dylid rhoi'r wybodaeth ddiweddaraf i'r Pwyllgor amdano. Wrth ddiolch i bawb a fu’n ymwneud â’r mater am eu gwaith, bu iddo sôn am yr angen i flaenoriaethu achosion cost uchel er mwyn cael effaith ar lefelau dyledion cyffredinol.

Diolchodd y Cadeirydd i’r swyddogion am eu presenoldeb a chynigiodd argymhelliad ychwanegol a gafodd ei eilio gan y Cynghorydd Bernie Attridge.

PENDERFYNWYD:

(a)       Bod y Pwyllgor yn nodi'r cynnydd a wnaed o ran rheoli cyllideb yn rhagweithiol ar gyfer anfonebau heb eu talu a godwyd gan y Cyngor i'w talu gan Fwrdd Iechyd Prifysgol Betsi Cadwaladr; a

(b)       Bod dyled pecyn gofal a ariennir ar y cyd dros 90 diwrnod yn cael ei ystyried ar frys i ddeall sut y gellir lleihau’r ddyled hon mewn modd amserol. Dylai’r gwaith gael ei wneud gan Bennaeth y Gwasanaeth ac Aelod Cabinet ac adrodd yn ôl i’r Pwyllgor hwn yn fisol.