Agenda item
Cylchdeithiau Casglu Gwastraff a threfniadau gweithredu newydd yn Safleoedd Canolfannau Ailgylchu Gwastraff y Cartref.
- Cyfarfod Special meeting, Pwyllgor Trosolwg a Chraffu yr Amgylchedd, Dydd Gwener, 16eg Mehefin, 2017 10.00 am (Eitem 9.)
- Cefndir eitem 9.
Rhoi gwybod i’r Pwyllgor am y newidiadau arfaethedig i’r cylchdeithiau casglu gwastraff a cheisio cymeradwyaeth ar gyfer model gweithredu newydd yn y Canolfannau Ailgylchu.
Cofnodion:
Cyflwynodd y Rheolwr Gwastraff a Gwasanaethau Ategol y newidiadau arfaethedig i amserlenni casglu gwastraff a'r trefniadau gweithredu newydd yng Nghanolfannau Ailgylchu Gwastraff y Cartref y Cyngor (CAGC). Darparodd y wybodaeth ddiweddaraf am y meysydd canlynol, fel y manylir arnynt yn yr adroddiad:-
- Trwyddedau preswylwyr yn unig
- Cynllun Trwyddedau Fan i Breswylwyr
- Rheoli CAGC
- Amseroedd Agor
- Newidiadau i amserlenni casglu gwastraff ac ailgylchu
Diolchodd y Cynghorydd Paul Shotton i’r swyddogion am adroddiad cadarnhaol a chroesawodd y cynnig i gadw’r Cynllun Trwyddedau Fan i Breswylwyr. Gwnaeth sylwadau ar y gwaith cadarnhaol a wnaeth y Tasglu yng Nglannau Dyfrdwy a gofynnodd a fyddai hyn yn cael ei gyflwyno’n raddol mewn wardiau eraill ledled y Sir. Gofynnodd hefyd a ystyriwyd cydweithio â Menter Gymdeithasol yn y CAGC, a p’un ai oedd y cyfleuster newydd yn Oakenholt ar y trywydd iawn i agor ym mis Medi 2017.
Ymatebodd y Rheolwr Gwastraff a Gwasanaethau Ategol, yn dilyn llwyddiant y Tasglu yng Nglannau Dyfrdwy, y bwriedir cynnal digwyddiadau tebyg ledled y Sir i helpu lleihau gwastraff ychwanegol. Nododd bod y Cyngor ar hyn o bryd y cydweithio â Menter Gymdeithasol mewn CAGC ar hyd a lled y Sir, a’u bod yn edrych ar ehangu’r gwasanaeth ailgylchu gyda hwy. Hysbysodd y Prif Swyddog y dylai’r cyfleuster newydd yn Oakenholt agor ym mis Medi 2017, ond y byddai’n dod ag adroddiad pellach ger bron y Pwyllgor pe byddai unrhyw newidiadau i’r dyddiad hwn. Cafodd y Pwyllgor sicrwydd gan y Dirprwy Arweinydd ac Aelod Cabinet Tai y byddai safleoedd y CAGC yn Fflint a Chei Connah yn aros ar agor hyd nes y bydd y cyfleuster newydd yn Oakenholt yn agor.
Croesawodd y Cynghorydd Richard Lloyd hefyd gadw’r Cynllun Trwyddedau Fan i Breswylwyr a gofynnodd sut y byddai’r Cynllun Trwydded i Breswylwyr yn Unig yn cael ei orfodi i sicrhau nad oeddent yn cael eu pasio i breswylwyr heb drwydded. Eglurodd yr Aelod Cabinet Strydwedd a Chefn Gwlad y byddai gwaith pellach yn cael ei gyflawni cyn gwneud penderfyniad ar gyflwyno Cynllun Trwydded i Breswylwyr yn Unig. Gofynnodd y Cynghorydd David Evans a ellid cyflwyno gwybodaeth ffeithiol i’r Pwyllgor ar faint o bobl oedd ddim yn preswylio yn Sir y Fflint oedd yn ymweld â’r CAGC ledled y Sir cyn gwneud penderfyniad ar y Cynllun Trwydded i Breswylwyr yn Unig.
Mewn ymateb i gwestiynau pellach, nododd yr Aelod Cabinet Strydwedd a Chefn Gwlad y byddai preswylwyr yn cael calendr 9 mis cyn bo hir, fydd yn cynnwys gwybodaeth am yr eitemau y gellir eu hailgylchu. Nododd hefyd y byddai’n adolygu cost casgliadau gwastraff swmpus.
Gofynnodd y Cynghorydd Sean Bibby a oedd gan y Cyngor yr adnoddau i dargedu gwastraff ychwanegol. Nododd yr Aelod Cabinet Strydwedd a Chefn Gwlad bod ystyriaeth yn cael ei roi i ailgyfeirio swyddogion gorfodi sydd ar hyn o bryd yn delio â thaflu sbwriel i weithio gyda pobl i’w hannog i ailgylchu a lleihau gwastraff ychwanegol.
Gofynnodd y Cynghorydd Chris Dolphin am i Aelodau lleol gael gwybod am unrhyw breswylwyr yn eu ward fyddai’n gweld newid yn eu diwrnod casglu neu eu hwythnos gasglu. Cytunodd y Rheolwr Gwastraff a Gwasanaethau Ategol i ddarparu’r wybodaeth hon i Aelodau lleol.
Mewn ymateb i bryderon a godwyd gan y Cynghorydd Dolphin o ran newidiadau rheolaidd i amseroedd casglu i breswylwyr, cytunodd y Dirprwy Arweinydd ac Aelod Cabinet Tai i ymchwilio i’r mater hwn yn dilyn y cyfarfod.
Mewn ymateb i’r Cynghorydd Andy Dunbobbin, eglurodd y Prif Swyddog bod y Cyngor eisoes wedi cyflwyno polisi i godi tâl ar archfarchnadoedd am gasglu a dychwelyd trolïau.
PENDERFYNWYD:
(a) Argymell y newidiadau arfaethedig i Bolisi Casglu Gwastraff y Cartref a Gweithredu Canolfannau Ailgylchu Gwastraff y Cartref y Cyngor i’r Cabinet; ac
(b) Argymell y newidiadau arfaethedig i’r amserlenni casglu gwastraff ac ailgylchu i’r Cabinet, i’w rhoi ar waith ym mis Medi, 2017.
Dogfennau ategol:
- Waste Collection Rounds and new operating arrangements at Household Recycling Centre (HRC) Sites, eitem 9. PDF 106 KB
- Appendix 1 - Waste Collection Rounds and new operating arrangements at Household Recycling Centre (HRC) Sites, eitem 9. PDF 188 KB